പെരിന്തൽമണ്ണ
07/05/23
കിണർ വൃത്തിയാക്കി കയറുന്നതിനിടയിൽ കാൽ തെറ്റി കിണറ്റിലേക്ക് വീണു പരിക്കേറ്റു
കിണര്‍ വൃത്തിയാക്കിയ ശേഷം കയറുന്നതിനിടെ തളര്‍ച്ചയനുഭവപ്പെട്ട് താഴേക്കുതന്നെ വീണു കാലിനും നടുവിനും ഗുരുതര പരിക്കേറ്റയാളെ അഗ്നിരക്ഷാസേനയും നാട്ടുകാരും ചേര്‍ന്ന് രക്ഷപ്പെടുത്തി.
പുലാമന്തോള്‍ യു.പി. പടി സ്വദേശി ചെറൂത്ത് അബ്ദുള്‍ ജലീലിനെ(30)യാണ് രക്ഷപ്പെടുത്തിയത്. ഇയാളെ പെരിന്തല്‍മണ്ണ കിംസ് അല്‍ശിഫ ആശുപത്രിയില്‍ പ്രവേശിപ്പിച്ചു. ഇന്നലെ വൈകീട്ട് നാലരയോടെ പുലാമന്തോള്‍ ആലന്പാറയിലാണ് അപകടം. മര്‍ക്കസ് ദാറുല്‍ഹുദാ ഓര്‍ഫനേജിന്‍റെ 45 അടിയോളം ആഴമുള്ള വെള്ളമില്ലാത്ത കിണറ്റിലാണ് വീണത്. കയറുന്നതിനിടെ പകുതിയിലേറെയെത്തിയപ്പോള്‍ തളര്‍ച്ചയുണ്ടായി.
അതോടെ കിണറിനടിയിലെ പാറയിലേക്ക് വീഴുകയായിരുന്നു. രക്ഷപ്പെടുത്താനിറങ്ങിയ നാട്ടുകാരനും തളര്‍ച്ചയുണ്ടായി മുകളിലേക്ക് കയറാനാകാതെ കുടുങ്ങി. പെരിന്തല്‍മണ്ണ അഗ്നിരക്ഷാനിലയത്തില്‍ നിന്നു സ്റ്റേഷന്‍ ഓഫീസര്‍ സി. ബാബുരാജന്‍റെ നേതൃത്വത്തിലുള്ള സംഘമെത്തി ആദ്യം നാട്ടുകാരനെ പുറത്തെത്തിച്ചു. പിന്നീട് അബ്ദുള്‍ ജലീലിന്‍റെ നടുവിന് പരിക്കേറ്റതിനാല്‍ വളരെ ശ്രദ്ധയോടെയാണ് സേനാംഗങ്ങള്‍ പുറത്തെത്തിച്ചത്. ഓഫീസര്‍മാരായ പി.കെ. മുഹമ്മദാലി, പി. മുഹമ്മദ് ഷിബിന്‍, വി. നിഷാദ്, കിഷോര്‍, ഗോപകുമാര്‍ എന്നിവരും രക്ഷാപ്രവര്‍ത്തനത്തില്‍ പങ്കെടുത്തു.
മീഡിയ വേൾഡ് ന്യൂസ് പെരിന്തൽമണ്ണ റിപ്പോർട്ട്
0 Comments