ഹർഷീനയുടെ സത്യാഗ്രഹം ഒരാഴ്ച്ചയിലേക്ക് ഇന്ന് കോഴിക്കോട് മെഡിക്കല്‍കോളേജില്‍ മുഖ്യമന്ത്രിയും ആരോഗ്യമന്ത്രിയും എത്തും.

കോഴിക്കോട്:

കോഴിക്കോട് മെഡിക്കല്‍കോളേജ് അത്യാഹിത വിഭാഗത്തിന്റെ ആധുനികകെട്ടിടം ഉദ്ഘാടനം ചെയ്യാനാണ് മുഖ്യമന്ത്രി പിണറായിവിജയനും ചടങ്ങില്‍ അദ്ധ്യക്ഷയായി ആരോഗ്യമന്ത്രി വീണാ ജോര്‍ജും എത്തുന്നത്.

മുഖ്യമന്ത്രിയെ കൂടാതെ കേന്ദ്ര ആരോഗ്യ കുടുംബക്ഷേമമന്ത്രി മന്‍സൂഖ് മാണ്ഡവ്യയും ചടങ്ങില്‍ പങ്കെടുക്കുന്നുണ്ട്. വൈകീട്ട് അഞ്ചിനാണ് പരിപാടി.

അഞ്ചുദിവസം നിരാഹാരസമരവും രണ്ടുദിവസമായി സത്യാഗ്രഹവും നടത്തുന്ന ഹര്‍ഷീനയുടെ പ്രശ്‌നത്തില്‍ എന്തെങ്കിലും ഇടപെടലുകളുണ്ടാവുമോയെന്നാണ് ജനങ്ങളുടെ ചോദ്യം.

മുഖ്യമന്ത്രിയും ആരോഗ്യമന്ത്രിയും കോഴിക്കോട് മെഡിക്കല്‍കോളജിലെത്തുമ്പോള്‍ തന്റെ നീതിയുടെ കാര്യത്തില്‍ പ്രതീക്ഷയുണ്ടെന്ന് ഹര്‍ഷീന പറഞ്ഞു. രണ്ടുമാസമായിട്ടും നേരിട്ട് വിളിച്ചിട്ട് കിട്ടാത്ത ആരോഗ്യമന്ത്രിയെ കാണണമെന്ന് ആഗ്രഹിക്കുന്നു. അന്വേഷണറിപ്പോര്‍ട്ടിനെക്കുറിച്ചും കൂടുതല്‍ അന്വേഷണം എന്താണെന്നും നേരിട്ട് ചോദിക്കണമായിരുന്നു. അതിനുള്ള അവസരം ഉണ്ടാകുമോയെന്ന് അറിയില്ലെന്നും ഹര്‍ഷീന പറഞ്ഞു.

അതിനിടെ മെഡിക്കല്‍കോളേജ് മാതൃശിശുസംരക്ഷണ കേന്ദ്രത്തിന് മുമ്പില്‍ തുടങ്ങിയ സമരം ഇന്നലെ മുതല്‍ കോണ്‍ഗ്രസിന്റെ നേതൃത്വത്തില്‍ മെഡിക്കല്‍കോളേജ് പ്രധാന കവാടത്തിന് മുന്നിലേക്ക് മാറ്റി. ഹര്‍ഷീനയുടെ വയറില്‍ നിന്നും കണ്ടെടുത്ത കത്രിക മെഡിക്കല്‍കോളജിലേതല്ലെങ്കില്‍ അത് എവിടെനിന്ന് വന്നു എന്നത് തെളിയിക്കാന്‍ സര്‍ക്കാരിന് ബാദ്ധ്യതയുണ്ടെന്ന് ഡി.സി.സി പ്രസിഡന്റ് കെ.പ്രവീണ്‍കുമാര്‍ പറഞ്ഞു. കത്രിക എവിടത്തേതായാലും കിട്ടിയത് ഹര്‍ഷീനയുടെ വയറ്റില്‍ നിന്നാണ്. അതും മെഡിക്കല്‍കോളേജില്‍ സര്‍ജറിക്ക് വിധേയമാക്കിയപ്പോള്‍. അതുകൊണ്ടുതന്നെ അത് എവിടുന്ന് സംഭവിച്ചതാണെന്ന് പറയാനുള്ള ബാദ്ധ്യതയും സര്‍ക്കാരിനും ആരോഗ്യമന്ത്രിക്കുമുണ്ടെന്നും പ്രവീൺ പറഞ്ഞു

മീഡിയ വേൾഡ് ലൈവ് ന്യൂസ് കോഴിക്കോട്