കാട്ടാനയുടെ ആക്രമണത്തിൽ നിന്നും ജീവൻ തിരിച്ചുകിട്ടിയ ഫോറസ്റ്റ് ഓഫീസറുടെ പുനർജന്മം

mediaworldlive news Kozhikode 

മക്കളേയും ഭർത്താവിനേയും ഇനി ഒരിക്കലും കാണാൻ കഴിയില്ല എന്ന് ഉറപ്പിച്ചതാണ് ദൈവം വീണ്ടും  ജീവിക്കാൻ ഒരവസരം നൽകി 

ജീവിതത്തിനും മരണത്തിലും ഇടയിലുള്ള നിമിഷത്തെ കണ്ടിട്ടുണ്ടോ ? ജീവന്‍ കൈയില്‍ വെച്ച്‌ പേടിച്ചരണ്ട പലരുടെയും കഥകള്‍ നമ്മള്‍ വായിച്ചിട്ടുണ്ട്.

പലര്‍ക്കും അവരുടെ രണ്ടാം ജന്മത്തെ കുറിച്ചാണ് പറയാനുള്ളത്. അതുപോലെ ഒരു കഥ തന്നെയാണ് ഇവിടെ സിന്ധുവിനും പറയാനുള്ളത്. ആനയുടെ ആക്രമണത്തില്‍ നിന്ന് ജീവന്‍ തിരികെ കിട്ടിയത് ആരുടെയൊക്കെയോ ഭാഗ്യം കൊണ്ട് തന്നെയാണ്. ഫോറസ്റ്റ് വാച്ചര്‍ കൊക്കാത്തോട് ശ്രീശൈലത്തില്‍ എം. സിന്ധുവിന് (41) ആണ് ആനയുടെ ആക്രമണത്തില്‍ നിന്നും ജീവന്‍ തിരികെ കിട്ടിയ കഥ പറയാനുള്ളത്. സിന്ധുവിനെ ആന കുത്താന്‍വരിക മാത്രമല്ല, മുന്‍കാലുകൊണ്ടു ചവിട്ടി വലിച്ചെറിഞ്ഞു ചതച്ചരച്ചതാണ്. ജീവിതം തിരികെപ്പിടിച്ചത് കരളുറപ്പും കൂടെയുള്ളവരുടെ അകംനിറഞ്ഞ സ്നേഹവും കൊണ്ടാണ്.

കാടിനേയും മൃഗങ്ങളെയും ചെറുപ്പം മുതല്‍ കണ്ടു വളര്‍ന്ന സിന്ധുവിന് അവയെല്ലാം ജീവിതത്തിന്റെ ഭാഗം തന്നെ ആയിരുന്നു. അങ്ങനെയാണ് എട്ടുവര്‍ഷം മുന്‍പ് ഫോറസ്റ്റ് വാച്ചറായി ജോലി നേടുന്നത്. ആദിവാസി മേഖലയില്‍നിന്നു സ്പെഷല്‍ റിക്രൂട്മെന്റ് വഴി നിയമനം ലഭിച്ച ആദ്യ ബാച്ച്‌ അംഗമാണു സിന്ധു. എട്ടുവര്‍ഷം മുന്‍പാണു നിയമനം ലഭിച്ചത്.

കേരളത്തിലെ എല്ലാ വനമേഖലകളിലേക്കും ഉള്‍ക്കാട്ടിലേക്കും എത്തിച്ച്‌ പ്രതികൂല സാഹചര്യത്തെയും നേരിടാന്‍ തക്കവണ്ണമായിരുന്നു പരിശീലനം.2021 ഓഗസ്റ്റ് 28ന് രണ്ടായിരത്തി ഒന്‍പത് കൂപ്പ് ഭാഗത്തായിരുന്നു സംഭവം. സൗത്ത് കുമരംപേരൂര്‍ (കുമ്മണ്ണൂര്‍) ഫോറസ്റ്റ് സ്റ്റേഷനിലെ വനപാലക സംഘത്തിനൊപ്പം ആദിച്ചന്‍പാറ വനത്തില്‍ രാത്രി ഡ്യൂട്ടിയായിരുന്നു.

ഡ്യൂട്ടികഴിഞ്ഞു രാവിലെ പത്തോടെ കാടിറങ്ങുന്നതിനിടെയാണു ആ സംഭവം നടന്നത്. പ്ലാന്റേഷനായിരുന്ന മേഖലയില്‍ വീണ്ടും മരങ്ങള്‍ നട്ടുപിടിപ്പിച്ചതടക്കം പരിശോധിക്കവെ തൊട്ടടുത്ത വലിയ തേക്കുതോട്ടത്തില്‍നിന്നു പൊടുന്നനെ സംഘത്തിനുനേരെ ഉറക്കെ ചിന്നംവിളിച്ച്‌ അതു പാഞ്ഞടുത്തു. മോഴയാന (കൊമ്ബുകള്‍ വളരാത്ത കൊമ്ബന്‍ )ആയിരുന്നു അത്. കൂടെയുണ്ടായിരുന്ന ഫോറസ്റ്ററെ ആന വലിച്ചു താഴെയിട്ടു. തിരിഞ്ഞ ആന സിന്ധുവിനു പിന്നാലെയായി.

ഓട്ടത്തിനിടെ കാല്‍തെറ്റി വീണു. പാഞ്ഞടുക്കുന്ന ആനയെ ഒരുനോക്കു കണ്ടു. അതോടെ ഉറപ്പായി, ജീവിതം ഇവിടെ അവസാനിച്ചു. നെഞ്ചില്‍ ഒരു നോവായി മക്കളുടെയും ഭര്‍ത്താവ് ശ്രീജേഷിന്റെയും മുഖം തെളിഞ്ഞു. ആന മുന്‍കാല്‍ ഉയര്‍ത്തി ചവിട്ടാനാഞ്ഞപ്പോ‍ള്‍ രണ്ടും കല്‍പിച്ച്‌ ആനയ്ക്കരികിലേക്ക് ഉരുണ്ടുമാറി. അപ്പോഴേക്കും സിന്ധുവിന്റെ ഇടതു നെഞ്ച് ചേര്‍ന്നുരഞ്ഞ് ആനയുടെ മുന്‍കാല്‍. 6 വാരിയെല്ലുകള്‍ ഒടിഞ്ഞു. നട്ടെല്ലിനു പരുക്ക്. ശ്വാസമെടുക്കാന്‍പോലുമാവാതെ നിമിഷങ്ങള്‍.

വായി‍ല്‍ ചോരയുടെ കനപ്പ്. ആനയുടെ 2 മുന്‍കാലുകള്‍ക്കിടയിലായിരുന്നു സിന്ധു. പക്ഷേ കരഞ്ഞില്ല, അനങ്ങിയില്ല. മരിച്ചെന്നു കരുതിയാകണം ആന വീണ്ടും തട്ടി, നിരക്കിയെറിഞ്ഞു. പിന്നാലെ നടന്നെത്തി പലതവണ ആഞ്ഞുതട്ടി. ജീവനുണ്ടോ എന്നു നോക്കുന്നതുപോലെ. എന്നിട്ടും അനക്കമില്ലാതിരുന്നത് കൊണ്ടാകണം വീണ്ടുമൊന്നു തൊഴിച്ച്‌ കാട്ടിലേക്കുപോയി. പക്ഷേ സിന്ധു അറിഞ്ഞു, അത് തൊട്ടടുത്തുതന്നെ പതുങ്ങിയിട്ടുണ്ടെന്ന്.

അയ്യോ നമ്മുടെ സിന്ധുസാര്‍ പോയെന്ന് കൂടെയുള്ളവര്‍ ആര്‍ത്തലച്ചു കരഞ്ഞു. ഓടിയെത്തിയവരോട് മുറിയുന്ന വാക്കുകളില്‍ പറഞ്ഞു, അതുപോയിട്ടില്ല, മാറാന്‍. ശ്വാസമുണ്ടെങ്കില്‍ സാറിനെ ഞങ്ങള്‍ തിരിച്ചെത്തിക്കുമെന്നു പറഞ്ഞ് വാരിയെടുത്ത സഹപ്രവര്‍ത്തകര്‍ കോന്നി താലൂക്കാശുപത്രിയിലേക്കു പറക്കുക തന്നെയായിരുന്നു. തുടര്‍ന്നു കോഴഞ്ചേരിയിലെ സ്വകാര്യ ആശുപത്രിയില്‍ 15 ദിവസം ഐസിയുവില്‍.

ചികിത്സയ്ക്ക് സ്വന്തം ശമ്ബളത്തില്‍ നിന്നെടുത്തു നല്‍കിയും തിരികെയെത്തിയപ്പോള്‍ സൗകര്യപ്രദമായി ഡ്യൂട്ടി നല്‍കിയും മേലുദ്യോഗസ്ഥരും സഹപ്രവര്‍ത്തകരും സിന്ധുവിന്റെ കൂടെയുണ്ട്. കരുതലായും സ്നേഹമായും അമ്മയെ പൊതിഞ്ഞുപിടിച്ചു സുധിനും ദിപിനും. ജീവന്റെ നേര്‍പാതിയെ എന്തുവിലകൊടുത്തും തിരികെപ്പിടിക്കാന്‍ വര്‍ക്ക് ഷോപ്പില്‍ അത്യധ്വാനം ചെയ്തു ഭര്‍ത്താവ് ശ്രീജേഷ്. ഒന്നരവര്‍ഷത്തിനിപ്പുറവും ചികിത്സ തുടരുകയാണ്. പക്ഷേ നടക്കാനായതു മുതല്‍ ഡ്യൂട്ടിയില്‍ പ്രവേശിച്ചു.

മീഡിയ വേൾഡ് ലൈവ് ന്യൂസ് കോഴിക്കോട്