കോഴിക്കോട്:
12/05/23
പ്രദർശന വിപണന മേളയ്ക്ക് ഇന്ന് കോഴിക്കോട് വെച്ച് തുടക്കം കുറിക്കും
കോഴിക്കോട്: സംസ്ഥാന സര്ക്കാരിന്റെ രണ്ടാം വാര്ഷികത്തോടനുബന്ധിച്ച് നടക്കുന്ന 'എന്റെ കേരളം' പ്രദര്ശന- വിപണന മേളയ്ക്ക് ഇന്ന് തുടക്കം.
വൈകിട്ട് ഏഴിന് കടപ്പുറത്ത് പൊതുമരാമത്ത് -ടൂറിസം മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്യും. വികസന, ക്ഷേമ പ്രവര്ത്തനങ്ങളില് സംസ്ഥാന സര്ക്കാര് കൈവരിച്ച മികവും നേട്ടങ്ങളും എന്റെ കേരളം പ്രദര്ശന വിപണന മേളയിലൂടെ തൊട്ടറിയാം. തോട്ടത്തില് രവീന്ദ്രന് എം.എല്.എ അദ്ധ്യക്ഷത വഹിക്കും. വനം മന്ത്രി എ.കെ ശശീന്ദ്രന്, തുറമുഖ മന്ത്രി അഹമ്മദ് ദേവര്കോവില്, എം.പിമാരായ എം.കെ രാഘവന്, കെ മുരളീധരന്, എളമരം കരീം, ബിനോയ് വിശ്വം, പി.ടി ഉഷ, മേയര് ഡോ. ബീന ഫിലിപ്പ് എന്നിവര് മുഖ്യാതിഥികളാവും. 69 വകുപ്പുകളുടെതായി 190- ഓളം സ്റ്റാളുകളാണ് ഒരുങ്ങുന്നത്. തീം വിഭാഗത്തിലും യൂത്ത് സെഗ്മെന്റ്, തൊഴില് വിദ്യാഭ്യാസ വിഭാഗത്തിലും കമേഴ്സ്യല് വിഭാഗത്തിലുമാണ് സ്റ്റാളുകള്. ശീതീകരിച്ച തീം കമേഴ്സ്യല് സ്റ്റാളുകള്, ഫുഡ് കോര്ട്ട് എന്നിവ മേളയുടെ പ്രധാന ആകര്ഷണമാകും. പരിപാടിക്ക് മുന്നോടിയായി വൈകിട്ട് അഞ്ചിന് മാനാഞ്ചിറയില് നിന്ന് ബീച്ചിലേക്ക് ഘോഷയാത്ര നടക്കും. വൈകിട്ട് ആറിന് താലൂക്കുകള് സംഘടിപ്പിക്കുന്ന ചെണ്ട മേളം അരങ്ങേറും. തുടര്ന്ന് തൈക്കുടം മ്യൂസിക് ബാന്ഡ് അവതരിപ്പിക്കുന്ന മെഗാ മ്യൂസിക് ഷോ.
13 ന് ഏഴ് മണിക്ക് ഗൗരിലക്ഷ്മി അവതരിപ്പിക്കുന്ന മ്യൂസിക് ഷോ, 14ന് ഏഴ് മണിക്ക് അതുല് നറുകര ആന്ഡ് ടീം അവതരിപ്പിക്കുന്ന കോളേജ് ഡേ തുടങ്ങിയ പരിപാടികളും അരങ്ങേറും. 15ന് ഏഴ് മണിക്ക് കൈതപ്രം ദാമോദരന്, യാസിന് നിസാര്, അരിസ്റ്റോ സുരേഷ്, സോണിയ ആമോദ്, റഹ്മാന്, സി.ജെ കുട്ടപ്പന്, നിമിഷ സലിം, കെ.വി അബൂട്ടി, വണ്ടൂര് ജലീല് എന്നിവര് ചേര്ന്ന് അവതരിപ്പിക്കുന്ന ഓള് ജനറേഷന് ട്യൂണ്സ് മ്യൂസിക് ഷോ നടക്കും. 16ന് ആറ് മണിക്ക് പ്രത്യേക പരിഗണന അര്ഹിക്കുന്ന കുട്ടികളുടെ ഗാനമേള "മല്ഹാര്", ജിംനാസ്റ്റിക് ഷോ, ഏഴ് മണിക്ക് ആശാ ശരത്ത് ആന്ഡ് ടീം അവതരിപ്പിക്കുന്ന നൃത്ത പരിപാടി എന്നിവയും അരങ്ങേറും. 17ന് ഏഴ് മണിക്ക് യുമ്ന അജിന് സംഗീത പരിപാടി അവതരിപ്പിക്കും.
സമാപന ദിവസമായ 18ന് 7 മണിക്ക് ഡോ. ഉമയാള്പുരം കെ. ശിവരാമന് നയിക്കുന്ന ജ്വാല മ്യൂസിക് ഫ്യൂഷനില് മട്ടന്നൂര് ശങ്കരന്കുട്ടി, ആറ്റുകാല് ബാലസുബ്രഹ്മണ്യം, തൃപ്പൂണ്ണിത്തറ രാധാകൃഷ്ണന്, ഫ്രിജോ ഫ്രാന്സിസ് എന്നിവര് കൂടി ഭാഗമാകും.
മാറ്റ് കൂട്ടാന് പുലികളും
എന്റെ കേരളം പ്രദര്ശന-വിപണന മേളയുടെ ഘോഷയാത്രയ്ക്ക് പൊലിമ കൂട്ടാന് ചെണ്ടമേളത്തോടൊപ്പം പുലികളുമെത്തും.
പഞ്ചവാദ്യം, കാവടിയാട്ടം, ടാബ്ലോ, തെയ്യം, കോല്ക്കളി, വട്ടപ്പാട്ട്, പൂരക്കളി തുടങ്ങി വിവിധ കലാരൂപങ്ങളും കലാപ്രകടനങ്ങളും ഘോഷയാത്രയില് അണിനിരക്കും. വിവിധ സര്ക്കാര് വകുപ്പുകളുടെ ആഭിമുഖ്യത്തിലുള്ള നിശ്ചല ദൃശ്യങ്ങളും, പ്ലോട്ടുകളും ഘോഷയാത്രയെ വര്ണാഭമാക്കും.ഇന്ന് വൈകിട്ട് അഞ്ച് മണിക്ക് ബി.ഇ.എം സ്കൂളില് നിന്ന് ആരംഭിക്കുന്ന ഘോഷയാത്രയോടെയാണ് ആഘോഷ പരിപാടികള്ക്ക് തുടക്കമാവുക. സി.എച്ച് മേല്പ്പാലം വഴി ഘോഷയാത്ര ബീച്ചിലെത്തും.
ആയത് കൊണ്ട് കോഴിക്കോട് ബീച്ചിൽ നല്ല തിരക്ക് അനുഭവപ്പെടാൻ സാധ്യതയുണ്ട്
മീഡിയ വേൾഡ് ന്യൂസ് കോഴിക്കോട്

0 Comments