കോഴിക്കോട്
അന്‍വര്‍ എം.എല്‍.എയുടെ പരാതിയില്‍ ശനിയാഴ്ച വെള്ളയില്‍ പൊലീസ് ചാനലിനെതിരെ കേസ് രജിസ്റ്റര്‍ ചെയ്തിരുന്നു.
പിന്നാലെയാണ് ഞായറാഴ്ച രാവിലെ പത്തരക്ക് പി.ടി. ഉഷ റോഡിലെ ഓഫിസില്‍ പരിശോധന ആരംഭിച്ചത്. ജില്ലാ ക്രൈംബ്രാഞ്ച് അസി. കമീഷണര്‍ വി. സുരേഷിന്റെ നേതൃത്വത്തില്‍ എട്ടുപേരടങ്ങുന്ന പൊലീസും തഹസില്‍ദാറും വില്ലേജ് ഓഫിസറും ഉള്‍പ്പെട്ട സംഘമാണ് പരിശോധന നടത്തുന്നത്. ഓഫിസിലെ കമ്പ്യൂട്ടർ റുകളില്‍ സൂക്ഷിച്ച വിഡിയോ ദൃശ്യങ്ങള്‍ അടക്കമുള്ളവയാണ് പൊലീസ് പരിശോധിക്കുന്നത്.
പരാതിയില്‍ എക്‌സിക്യൂട്ടീവ് എഡിറ്റര്‍ സിന്ധു സൂര്യകുമാര്‍, റീജനല്‍ എഡിറ്റര്‍ ഷാജഹാന്‍ കാളിയത്ത്, വിഡിയോ ചിത്രീകരിച്ച റിപ്പോര്‍ട്ടര്‍ നൗഫല്‍ ബിന്‍ യൂസഫ്, പെണ്‍കുട്ടിയുടെ മാതാവ് എന്നിവര്‍ക്കെതിരെ പോക്സോ, വ്യാജ രേഖ ചമക്കല്‍, ക്രിമിനല്‍ ഗൂഡാലോചന എന്നീ വകുപ്പുകള്‍ ചേര്‍ത്താണ് കേസ് രജിസ്റ്റര്‍ ചെയ്തത്.
2022 നവംബര്‍ പത്തിന് ഏഷ്യാനെറ്റ് ന്യൂസില്‍ സംപ്രേഷണം ചെയ്ത റിപ്പോര്‍ട്ടില്‍ സ്കൂള്‍ വിദ്യാര്‍ഥിനിയുടേതായി വന്ന അഭിമുഖം വ്യാജമാണെന്നായിരുന്നു പരാതി. സഹപാഠികള്‍ ലൈംഗികമായി ചൂഷണം ചെയ്യാറുണ്ടെന്നും പത്തിലധികം വിദ്യാര്‍ഥിനികള്‍ ചൂഷണത്തിന് വിധേയരായിട്ടുണ്ടെന്നും അഭിമുഖത്തില്‍ മുഖംമറച്ച പെണ്‍കുട്ടി പറഞ്ഞിരുന്നു.
മീഡിയ വേൾഡ് ന്യൂസ് കോഴിക്കോട്
0 Comments