മലയാള ചലച്ചിത്ര നടി മോളി കണ്ണമാലി ജീവിതത്തിലേക്ക് തിരികെ വന്നു

 mediaworldlive news Kozhikode 

കൊച്ചി

രോഗം മാറിയതിനു ശേഷം നടന്‍ ബാലയെ കാണാന്‍ എത്തിയിരിക്കുകയാണ് താരം. കുടുംബത്തിനൊപ്പമാണ് ബാലയെ കാണാന്‍ മോളി കണ്ണമാലി എത്തിയത്. മരണത്തെ മുന്നില്‍ കണ്ടെന്നും ആ സമയത്ത് സഹായിച്ചത് ബാലയാണെന്നുമാണ് താരം പറയുന്നത്. ബാലയോട് നന്ദി പറഞ്ഞ മോളി കണ്ണമാലി തന്റെ ജീവിതത്തിലെ ഇപ്പോഴത്തെ പ്രതിസന്ധിയെക്കുറിച്ചും പറയുന്നുണ്ട്. തന്റെ വീടിന് ജപ്തി വന്നിരിക്കുകയാണ് എന്നാണ് മോളി കണ്ണമാലി പറയുന്നത്.

മരണത്തെ ഞാന്‍ നേരിട്ട് പോയി കണ്ടിട്ട് തിരിച്ച്‌ വന്നയാളാണ്. ഇപ്പോഴും എന്റെ മക്കള്‍ എന്റെ ചികിത്സയ്ക്കായി ഒരുപാട് കഷ്ടപ്പെടുന്നുണ്ട്. ഞങ്ങള്‍ മത്സ്യതൊഴിലാളികളാണ്. ഇപ്പോള്‍ ഞങ്ങള്‍ ബാല സാറിന്റെ അടുത്ത് വന്നത്... എനിക്ക് ആദ്യം അറ്റാക്ക് വന്നപ്പോള്‍ എന്റെ പട്ടയം കൊണ്ട് പണയം വെച്ച്‌ ഒരു നാല് ലക്ഷം രൂപ മേടിച്ചിട്ടുണ്ടായിരുന്നു. കൊറോണ വന്ന സമയത്ത് വര്‍ക്ക് കുറഞ്ഞപ്പോള്‍ എനിക്ക് തിരിച്ചടക്കാന്‍ പറ്റിയില്ല. ഇപ്പോള്‍ എനിക്ക് ജപ്തി വന്നിരിക്കുകയാണ്. പതിമൂന്നാം തിയ്യതി ആറ് ലക്ഷം രൂപയോളം കൊടുക്കണം. എനിക്ക് ഒരു നിവര്‍ത്തിയുമില്ല. അക്കാര്യം ബാല സാറിനോട് പറയാന്‍ വന്നതാണ് ഞാന്‍. ഞാന്‍ കിടന്നപ്പോള്‍ എന്റെ മകന്‍ ഓടിവന്നപ്പോള്‍ ബാല സാര്‍ സഹായിച്ചു. മരണപ്പായയില്‍ നിന്ന് എഴുന്നേറ്റ് ഞാന്‍ ആദ്യം വരുന്നത് ഇങ്ങോട്ടേക്കാണ്. - മോളി കണ്ണമാലി പറഞ്ഞു.

എനിക്കും ബാലയ്ക്കും ഒന്നിച്ച്‌ മലയാള സിനിമയില്‍ അഭിനയിക്കണമെന്ന് ആഗ്രഹമുണ്ടെന്നും മോളി കൂട്ടിച്ചേര്‍ത്തു. ദൈവത്തിന്റെ അത്ഭുതം എന്ന അടിക്കുറിപ്പിലാണ് ബാല വിഡിയോ പങ്കുവച്ചത്. ചികിത്സയ്ക്കും മറ്റുമായി ചെറിയ തുകയുടെ ചെക്കും ബാല കൈമാറുന്നുണ്ട്.

അടുത്തിടെയാണ് ന്യുമോണിയ ബാധിതയായ മോളി കണ്ണമാലിയെ കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചിരുന്നു. പനിയും ശ്വാസം മുട്ടലും രൂക്ഷമായതിനാലാ കണ്ണമാലിയെ ആശുപത്രിയിൽ എത്തിച്ചത്

മീഡിയ വേൾഡ് ന്യൂസ് കൊച്ചി