പഴയ പാലം ഓർമ്മയായി ചെട്ടിക്കടവിൽ പുതിയപാലം ഉദ്ഘാടനത്തിനൊരുങ്ങി

media world live news Kozhikode 

ചാത്തമംഗലം, 

26/02/2024

പെരുവയൽ ഗ്രാമപഞ്ചായത്തുകളെ ബന്ധിപ്പിച്ചുകൊണ്ട് ചെട്ടിക്കടവിൽ നിർമ്മാണം പൂർത്തീകരിച്ച പാലം ഉദ്ഘാടനത്തിനൊരുങ്ങി. 2024 ഫെബ്രുവരി 29 വ്യാഴം വൈകീട്ട് 5.30ന് പൊതുമരാമത്തും ടൂറിസവും വകുപ്പ് മന്ത്രി പിഎ മുഹമ്മദ് റിയാസ് പാലത്തിൻ്റെ ഉദ്ഘാടനം നിർവഹിക്കും. പി.ടി.എ റഹീം എംഎൽഎ അധ്യക്ഷത വഹിക്കും. 

ചെറുപുഴക്ക് കുറുകെ ചെട്ടിക്കടവിൽ വീതി കുറഞ്ഞ ഒരു ചെറിയ പാലമായിരുന്നു നിലവിലുണ്ടായിരുന്നത്. 1997-98 വർഷത്തിൽ എം.കെ നമ്പ്യാർ മാസ്റ്റർ ചാത്തമംഗലം ഗ്രാമപഞ്ചായത്ത് പ്രസിഡണ്ടായിരിക്കെ ജനകീയാസൂത്രണ പദ്ധതിയിൽ ഉൾപ്പെടുത്തിയാണ് ഈ പാലം നിർമ്മിച്ചിരുന്നത്. കെ.എ ഖാദർ മാസ്റ്റർ ചാത്തമംഗലം ഗ്രാമപഞ്ചായത്ത് പ്രസിഡണ്ടായിരിക്കെ സ്വാതന്ത്ര്യത്തിൻ്റെ അമ്പതാം വാർഷികത്തോടനുബന്ധിച്ച് ചെട്ടിക്കടവിൽ നാലടി വീതിയുള്ള ഒരു നടപ്പാലം നിർമ്മിക്കുന്നതിന് പദ്ധതി തയ്യാറാക്കുകയും ആയത് നാട്ടുകാരുടെ സഹകരണത്തോടെ പ്രാവർത്തികമാക്കുന്നതിന് പി ചന്തുക്കുട്ടി മാസ്റ്റർ കൺവീനറായി ഒരു ആക്ഷൻ കമ്മിറ്റി രൂപീകരിക്കുകയും ചെയ്തിരുന്നു. നാട്ടുകാർ ആഘോഷമായി നടപ്പാലത്തിനുള്ള നിർമ്മാണ വസ്തുക്കൾ ശേഖരിക്കാൻ തുടങ്ങിയതിനിടയിലാണ് നെച്ചൂളി വാർഡിൽ ഉപതെരഞ്ഞെടുപ്പ് നടക്കുകയും ഇടതുമുന്നണി സ്ഥാനാർഥിയായ സി.ടി രമണി അട്ടിമറി വിജയം നേടുകയും ചെയ്യുന്നത്. ഇതോടെ യുഡിഎഫിന് ഭരണം നഷ്ടപ്പെടുകയും 

സിപിഎമ്മുകാരനായ എം.കെ നമ്പ്യാർ മാസ്റ്റർ ഗ്രാമപഞ്ചായത്ത് പ്രസിഡണ്ടാവുകയും ചെയ്തു. തുടർന്ന് ചെട്ടിക്കടവ് നടപ്പാലം രാഷ്ട്രീയ വിവാദങ്ങളുടെയും വെല്ലുവിളികളുടേയും വേദിയായി മാറി. ചെട്ടിക്കടവിൽ നടപ്പാലത്തിന് പകരം ചെറിയ വാഹനങ്ങൾക്ക് കടന്നുപോകാൻ സൗകര്യപ്പെടുന്ന ഒരു ജീപ്പബിൾ പാലം നിർമിക്കണം എന്നതായിരുന്നു നമ്പ്യാർ മാസ്റ്ററുടെ കാഴ്ചപ്പാട്. പഞ്ചായത്ത് യോഗത്തിൽ ഇക്കാര്യം ചർച്ചക്ക് വന്നതോടെ കെ.എ ഖാദർ മാസ്റ്ററുടെ നേതൃത്വത്തിലുള്ള പ്രതിപക്ഷം എതിർപ്പ് പ്രകടിപ്പിക്കുകയും ഫണ്ട് കണ്ടെത്താൻ സാധിക്കില്ലെന്ന വാദം ഉയർത്തുകയും ചെയ്തു. അത് അവഗണിച്ചുകൊണ്ട് 1997-98 കാലയളവിൽ ജനകീയാസൂത്രണത്തിൻ്റെ ഭാഗമായി ഗ്രാമ-ബ്ലോക്ക്-ജില്ലാ പഞ്ചായത്തുകളുടെ സംയുക്ത പദ്ധതിയായി പാലം നിർമ്മിക്കാൻ തീരുമാനമെടുക്കുകയും എം.കെ നമ്പ്യാർ മാസ്റ്ററുടെ നേതൃത്വത്തിലുള്ള ഭരണസമിതി പൊതു സഹകരണത്തോടെ പാലം എന്ന ചെട്ടിക്കടവുകാരുടെ സ്വപ്നം യാഥാർത്ഥ്യമാക്കുകയുമായിരുന്നു. 

ചെറുപുഴയിലൂടെ ഒരുപാട് വെള്ളം ഒഴുകിപ്പോയി. നാടും നാട്ടുകാരും മാറുകയും റോഡുകൾ നവീകരിക്കപ്പെടുകയും വാഹനത്തിരക്ക് വർധിക്കുകയും ചെയ്തു. ഇതോടെ ചെട്ടിക്കടവിൽ വലിയ വാഹനങ്ങൾക്ക് കടന്നുപോകാൻ പറ്റുന്ന പുതിയ പാലമുണ്ടാക്കണമെന്ന ആവശ്യം ശക്തമായി. തുടർന്ന് 6-11-2020ന് പാലം നിർമ്മാണത്തിന് സർക്കാർ 11.16 കോടി രൂപ അനുവദിച്ചതോടെയാണ് നാട്ടുകാരുടെ ഏറെക്കാലമായുള്ള സ്വപ്നത്തിന് ചിറക് മുളക്കുന്നത്. 2021 ഡിസംബർ 5 ന് പൊതുമരാമത്ത് വകുപ്പ് മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്ത് ആരംഭിച്ച പാലം പ്രവൃത്തിയുടെ കരാർ എടുത്തത് പി.ടി.എസ് ഹൈടെക് പ്രോജക്ട്സ് ഇന്ത്യ ലിമിറ്റഡ് ആണ്. 

32.825 മീറ്റർ നീളത്തിലുള്ള രണ്ട് സ്പാനും, 12.50 മീറ്റർ നീളത്തിലുള്ള 2 ലാൻ്റ് സ്പാനും, 32 മീറ്റർ നീളത്തിലുള്ള സെൻ്റർ സ്പാനും ഉൾപ്പെടെ അഞ്ച് സ്പാനിൽ 123.55 മീറ്റർ നീളത്തിലാണ് പാലം നിർമ്മിച്ചിട്ടുള്ളത്. ഇരുവശങ്ങളിലും 1.50 മീറ്റർ വീതിയിൽ നടപ്പാതയും, 7.50 മീറ്റർ വീതിയിൽ കാരിയേജ് വേയും ഉൾപ്പെടെ ആകെ 11 മീറ്റർ വീതിയാണ് പാലത്തിനുള്ളത്. പാലത്തിൻ്റെ അടിത്തറ പൈൽ ഫൗണ്ടേഷനാണ്. ചെട്ടിക്കടവ് ഭാഗത്ത് 168 മീറ്ററും, ചാത്തമംഗലം ഭാഗത്ത് 190 മീറ്ററും നീളത്തിൽ അനുബന്ധ റോഡും നിർമ്മിച്ചിട്ടുണ്ട്.

മീഡിയ വേൾഡ് ലൈവ് ന്യൂസ് കോഴിക്കോട്

വാർത്തകൾ പരസ്യംങ്ങൾ താഴെക്കാണുന്ന നമ്പറിൽ വാട്സപ്പ് ചെയ്യുക

9633346448 

media world live news Kozhikode